پاکستان مسلم لیگ (ن) نے وزیر اعظم عمران خان سے 11سوالوں کا جواب مانگتے ہوئے کہا ہے کہ عمران خان دائیں بائیں دیکھیںوہ کرپشن کی زندہ علامتوں کے محافظ بن چکے ہیں‘عمران صاحب!رونا چھوڑیں‘بتائیں غریبوں سے روٹی کا نوالہ کیوں چھینا؟ بجلی گیس کیوں مہنگی کی؟‘عمران صاحب! شہبازشریف کی گرفتاری کے پہلے ہی دن آپ کی گھبراہٹ عیاں ہے‘عمران صاحب دو ماہ میں لوٹا ہوا کتنا مال واپس آیا؟ پی ٹی آئی ملازمین کے اکا ﺅنٹس میں ہنڈی کے ذریعے آنےوالی کروڑوں روپے کی منی لانڈرنگ پر عمران خان تحقیقات کیوں نہیں کراتے؟ جسکی 4سال پہلے ہی نشاندہی ہوچکی ہے جس پر پردہ ڈالنے کے لئے پانچویں رٹ پٹیشن اسلام آبادہائیکورٹ میں کی ہوئی ہے۔(ن) لیگ کی تر جمان مر یم اورنگز یب کے جاری اعلامیہ میں کہا گیا ہے کہ جسٹس(ر)وجیہ ، جنرل(ر)حامدخان اور اکبر بابر نے پی ٹی آئی کے اندر جس کرپشن کی نشاندہی کی اس پر کاروائی کرنے کے بجائے وسل بلوائیرز کو ہی نشان عبرت کیوں بنادیاگیا؟9ارب ڈالر کی دوبئی میں پراپرٹیز پاکستانیوں نے خریدی ہیں، اس میں 60ارب روپے کی جائیداد عمران خان کی اپنی بہنوں کی ہے جن کا کوئی ذریعہ آمدن نہیں ماسوائے اس کے کہ خیراتی اداروں کے بورڈز کی ارکان ہیں۔ ان کی تحقیقات کب شروع کریں گے؟22سال تبدیلی کے نام نہاد دعوے کے بعدایک ایسا شخص وزیراعلی بنادیا جو ایک ماہ پہلے ہی پارٹی میں شامل ہوا تھا۔عثمان بزدار کوغربت کی وجہ سے عہدہ دیا تو بلوچستان سب سے غریب صوبہ ہے وہاں نواب کو وزیراعلی کیوں بنایا؟دعوی تھا بجلی،گیس چوری ختم کرنےکا لیکن حکومت ملتے ہی نیازی صاحب نے غریبوں کا گلا دبا دیا۔ اداروں کو فعال بنانے کے بجائے مخالفین کے انتقام پر لگادیا۔عمران خان کی کابینہ دوستوں اور حواریوں پر مشتمل ہے، تاریخ میں کرپٹ ترین کابینہ ثابت ہوگی۔ چین میں آج بھی سب سے زیادہ کرپشن پر سزائے موت دی جاتی ہے وہ دنیا کی دوسری بڑی معاشی قوت بن چکا ہے، معاشی پالیسیوں سے قومی آمدن بڑھائی، ڈرامہ بازی اور تماشے نہیں کئے۔ عمران صاحب آپ اس طرح کی پریس کانفرنس سے اپنی کارکردگی سے عوام کی توجہ نہیں ہٹاسکتے۔ کرپشن کے نام پر غریب کے منہ سے روٹی چھینی ہے اسے چھپانے کی کوشش نہ کریں۔ عوام کو یہ بھی بتائیں کہ خیبرپختونخواہ کا 45ارب کاقرض کیوں لیا اور وہ کہاں گیا؟خیبرپختونخوا کی 65ارب کی بجلی چوری کیوں نہیں پکڑی؟خیبرپختونخوا کی میٹرو کی کرپشن 80ارب پر کیسے پہنچی؟ذوالفی بخاری ، علیمہ خان، علیم خان، جہانگیر ترین کی بیرون ملک پراپرٹی کی نیلامی کی تاریخ بتائیں؟اپنے 100دن کے پلان کی نکلتی ہوئی ہوا نہ چھپائیں۔ عمران صاحب ! اب بڑھکیں نہ ماریں اور لوٹا پیسہ واپس لائیں۔عمران صاحب ! نوازشریف کے 300ارب واپس لائیں یا پھر معافی مانگیں۔عمران صاحب نیب کو اپنے سیاسی انتقام کے لئے استعمال کرنے سے آپ کی نااہلی اور ملک دشمنی چھپ نہیں سکتی۔ احتساب کمشن کے 6ارب کدھر گئے؟عمران صاحب پھر وہی رونا وہی جھوٹ اور پھر وہی تماشا۔آپ کا، آپکی بہنوں، دوستوں اور حواریوں کا نام بیرون ملک جائیدادیں بنانے والوں میں سرفہرست ہے۔ قوم انتظار میں ہے کہ کب آپ یہ سرمایہ واپس لوٹائیں گے؟2016 اور 2017 میں صرف ایک سال میں پیسکو کے بجلی نقصانات اور بلوں کی وصولی میں 48فیصد خسارہ کا سامنا رہا۔ پیسکو کو 130ارب روپے کی بجلی ملی جس میں سے 60ارب روپے کا مجموعی نقصان ہوا۔ 2017 اور2018 میں خیبرپختونخوا حکومت کا کل 55ارب روپے کا خسارہ تھا۔ اس کے بارے میں قوم کو کب بتائیں گے؟مالی سال 2017اور2018 میں خیبرپختونخوا حکومت کا غیرملکی قرض پچاس ارب روپے سے زائد تھا۔ گیس کی قیمتوں میں تاریخی اضافے کا قوم پر بوجھ نہ پڑتا اگر خیبرپختونخوا میں صرف کرک اور کوہاٹ والے ہی گیس کے بلوں کے واجبات اداکردیتے تو گیسی کی قیمتوں میں یہ اضافہ نہ کرنا پڑتا۔
